Tura, May 11,2025:ASPF aro GSMC, Tura-ko Winter Capital songchina dabie, Sonibar salo chang 10-gipa Winter Capital Awareness Campaign-ko West Garo Hills a·jani Raksamgre kal·chakram biapo ong·atangaha.
Ia tom·bimonganio songni Nokmarang, Sordar-rang aro jolni bang·a manderang bak ra·angtokaha.
Tom·anio ASPF, HQ-ni General Secretary Bernita R.Marak, Winter Capital-ni bidingo manderangna talate on·angaha. Apsandaken, GSMC, HQ-ni Acting Chairman Balkarin Ch.Marak-ba Winter Capital-na dabianio pilakan apsan bakrime, A·chik jat aro a·songni namgnina apsan ku·rang on·pachina sakantikon didiangaha.
Uandake, Raksamgre jolni NGO-rang Niksamso Garo Community Organisation (NGCO), Constitutional Rights Forum (CRF) aro gipin NGO-rangba tom·anio bak ra·e, mikkangchi Winter Capital-ko man·kuja dipetna, bilakbate ja·ku de·angkugen, ine jinma ku·rachake ra·chakangtokaha, ine ASPF HQ-ni Chief Organising Secretary Raksim Marak u·iataha.
