Tura, Sept 13, 2024: International Day of World’s Indigenous People (IDWIP)-ni National Conference-ko September 12-oni 13 tarikona Himachal Pradesh-ni Solan District-o ong·atangaha.

Ia program-ona North East Indigenous People’s Forum (NEIPF)-ni Secretary Bostone M.Sangma okamatako man·e bak ra·angpaaha.

Bostone Sangma ua program-o bak ra·ani somoio, A·chik jatni dakbewal rikbewalrangko, parakatna man·ahani gimin, namen kusi ong·aniko parakatenba, mikkangchi tribal jatrangni neng·nikanirangko India a·songni dilgiparang kam ka·na ku·rachakangaha. Uni gimin bang·a songni nokni manderangko gronge, kamrangko ka·anggen ineba parakataha.

Ia program namen gamchatgipa ong·aha, maina a·brio songdongenggipa (Indigenous) manderangni dakbewal rikbewalrangko ripingani ong·a ineba parakataha.

NEIPF-ni President Stalyn Ingti, ia program-o dongpae, jinmana aganprakangengon, “Chinga Karbi jat District Council-ni bidingo namen neng·nikaniko man·enga aro dingtang dingtang kamrangko nosto ka·engaha. Uarangko ripingani pal batesa department-rang pale sim·e nosto ka·enga. Indake Indigenous-ni ma·manti gam jinrangko nosto ka·engaha” ine parakangaha.

Indake, program-o Maharashtra-ni Dr. Sunil Parhad-ko gital dilgipana seokangjolenba, una kusi ong·chakani kattangko parakangtokaha.