Tura, Aug 17, 2024: Re·anggipa Lok Sabha election-o Meghalaya a·dokni Parliamentary Constituency damgnion, NPP-na chakpaaniko on·china ma·mongni dilgiparang ge·etaniko on·ahaoba dakchakaniko on·jaha ine NPP dilgipani matnanganiko BJP-ni State Vice President Bernard N.Marak jegalatskaaha.
“NPP-ko chinga cha·boka ong·ja, maina chinga NPP-na 80,000 vote-rangko man·e on·na ku·rachake, 80,000 vote-rangkon man·e on·aha. NPP-ni manderang an·tangtangan NPP-na pu·onjahani a·selsa NPP amako man·aha” ine BJP-ni State Vice President aro Tura-ni MDC Bernard N. Marak parakataha.
Tura Lok Sabha constituency-o BJP, ‘cha·bokahani’ a·selsa NPP amako man·aha aro ia kattako Tura-ni MDC Bernard Marak an·tangan parakaha ine NPP-ni dilgipa aro a·dokni Cabinet Minister Rakkam A Sangma parakatskaha.
Rakkam Sangma-ni matnangatanina aganchakatskaengon, “Local news channel-o angko interview ra·ako ua bon·e nijahakon. BJP-na tikit on·aniko NPP champengatahaon, chingkoba NPP-na chakpachina ge·etahani gimin chinga candidate-ko susaatjaha inesa anga aganahachim” ine BJP dilgipa parakataha.
“Lok Sabha election-na skang chinga a·bri aro a·kawe jolrangona re·angaha aro manderang, BJP-na pu·onna kusi ong·tokahachim. Indiba BJP candidate-ko susaatgija, chingko NPP-na chake kam ka·china High Command-oni ge·etaha. Ia ge·etaniko on·ani ja·man, Garo Hills-o bang·a dilgiparangan kusi ong·tokjaha aro doltangko wate katna a·bachengaha. BJP-na kam ka·giparang bang·batan party-ni kosako chakate, Congress-na pu·onskaaha” ine Bernard Marak aganaha.
NPP-ni National President aro a·dokni Skotong Minister Conrad K Sangma baksa tom·ani somoion BJP, NPP-na 80,000 vote-rangko man·e on·na ku·rachakaha, “Lok Sabha election-o 80,000 vote-rangko NPP man·china chinga raken kamko ka·aha. Re·anggipa chang MLA election-ode BJP-ni voter-rang sak 90,000-mang dongachim, indiba Lok Sabha election-na skang party-ko wate katgiparang dongani gimin, chinga rakbate kamrangko ka·skaaha” ine BJP-ni Vice President parakataha.
Lok Sabha election-o Saleng A Sangma-na chaka inako jegalatengon, “Anga Saleng Sangma-na chaka ine aganjachim, indiba ua angni dakchakaniko bi·na angona re·baaha inesa aganachim. Anga saksa BJP-ni dilgipa ong·e maming dakeba Congress-na pu·onna man·ja aro anga party-ko wate katgipa manderangkoba champengna man·skaja” ine Bernard Marak talatskaha.
