Guwahati, Sept 8,2024: Assam-ni Nagaon district-o donggipa Dhing minggipa songo bilsi 14-ni me·chik bi·sa saksako sakgittam manderang til·ekdraani ja·man kate dongenggipa sakgni manderangko Assam pulisrang September 6 tarik Sukrobar salo rim·na man·aha.

Koborni gitade, dos dakgipa sakgni manderang an·tangtangko pulisna bame on·eaha aro uamangko Sonibar salo Court-na pakwataha.

Dosi dakgipa sakgni manderang re·anggipa August 22 tariko a·sel ong·aonin pulisna kenenba kate dongengachim.

Assam-ni Skotong Minister Himanta Biswa Sarma-ba dos dakgipa manderangko rim·ani koborko social media gita parakataha.

“Nagaon District-ni Dhing songo me·chik bi·sa saksako til·ekdraani ja·man kate dongenggipa sakgni manderangko Assam Pulis rim·aha” ine Skotong Minister Hemanta Biswa Sarma X-o parakataha.

Bilsi 14 ong·gipa me·chik bi·sako Dhing songo sakgittam manderang til·ekdraanio jak donggipa saksako pulisrang August 24 tariko rim·aha, indiba rim·ani ja·mano, dos dakgipa mande sepango donggipa digio bilone siaha.

Rim·ako man·gipa Tafazul Islam, jean me·chik bi·sako til·ekdraanio mongsongbatgipa ong·achim, uko a·sel ong·ani walon rim·aha indiba, pulis custody-oni katenba, digio bilone siaha ine pulisrang parakaha.

Class X-o poraienggipa me·chik bi·sako sakgittam manderang August 22 tarik attamo Assam-ni Nagaon District-o donggipa Dhing minggipa songo drae til·ekahachim.

Ua me·chik bi·sa tuition matchote, an·tangni by-cycle-o re·bapilengmitting somoio denggu manderangko gronge kenbegipa a·selko chagrongaha. A·sel ong·ani ja·mano ua me·chik bi·sani sorokramo siboke dongako songni manderang nike, uko bakan hospital-ona ra·angaha ine koborna parakaha.