Tura, May 17, 2025: Tura-ko Winter Capital songchina dabiengani bidingo songni nokni manderangna agan-talate on·na gita Sukrobar salo, A·chik State Peoples’ Front (ASPF) aro GSMC chang 11-gipa tom·bimonganiko, West Garo Hills a·jani Rajabala Chokchokkia kal·chakramo ong·atangaha.

Ua tom·anio, Rajabala jolni dingtang dingtang NGO-rang jekai GSU, APA, GSMC aro FKJGP baksana songni Nokmarang bakrime ong·atangaha.

Ua tom·aniko ong·atani bidingo ASPF-ni General Secretary Bernita Marak, jinmana talatangengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarang ong·a aro iani bidingo A·chik a·songni manderangna u·iatna aro dabianio bakrimaniko on·china didienba ASPF aro GSMC Garo Hills-ni pilak biaprangon Awareness Program-rangko ong·atenga ine aganangaha.

Jowai-ko Summer Capital songchina, Jaintia Students Union (JSU)-ni dabiskaengani gimin janapangengon, ua dabianina ASPF-ba JSU-na chakpaaniko on·enga, indiba Summer Capital-ko Shillong-oniko Jowai-ona apjitatskachina Marak, a·dok sorkariko didiataha.

Ja·mano Chokchokia songni Nokma, jinmana mittelpilani kattarangko agane, Isolko mittelenba tom·aniko matchotataha.