Tura, Sept 4,2024: Garo Hills Autonomous District Council (GHADC)-o man·enggipa neng·nikanirangko namatna gita dolgni bakrime agangrikachisa namatna gita man·gen, ine Batabari-ni MDC aro Forest & Environment-ni Executive Member I/c Ashahel D Shira parakatenba, jingjengataniko dontonge kamtangtangko ka·epilchina jingjengatenggipa GHADC-ni employee-rangko didiataha.
GHADC-o tangka paisana neng·nikanirangko namatna aro Garo Hills-ni manderangna maming neng·nikani gri dangdike on·na GHADC-ni Executive Committee, on·kange kam ka·enga ineba Shira parakataha.
Asahahel Shira-ni parakatani gitade, GHADC-o tangka paisana neng·nikanirangko namatna, Executive Committee (EC)-ni dilgiparang, chanchibewale kamrangko ka·enga aro kamrangko nambatatna jotton ka·enga.
“Chinga Meghalaya sorkari aro ma·mong sorkari baksa iani bidingo agangrike, GHADC-o kam ka·enggiparangni dormaharangko on·na gita gong kror 252 tangkarangko dakchakatchina, ma·mongni Home Affairs Ministry-ni Secretary-na sedoataha. Ia chanchianirang GHADC-o kam ka·giparangni namgnina be·en pil·gen ine chinga ka·dongenga” ine Shira parakataha.
“GHADC-o tangka paisana neng·nikanirangko chagrongengoba, GHADC-ko chalaienggipa EC, Meghalaya High Court-ni ge·etani gitan kam ka·giparangna dormaharangko on·na man·enga. Garo Hills-o songdongenggipa manderangna maming neng·nikanirangko on·ani gri kam ka·anian chingni mongsonggipa daito ong·enga” Batabari-ni MDC parakataha.
GHADC-o kam ka·enggiparangni kam dontonge jingjengatanichi, Council-ni kajinarangko man·anio aro dingtang dingtang kamrangko ka·anio nangchakeaniko man·engaha ine Ashahel Shira suk ong·gijaniko parakatenba, dolgni apsan bakrime kam ka·achisa neng·nikanirangko namatna man·gen. Uni gimin, jingjengataniko dontonge kamtangtangona re·bapilchina Non Gazetted Employees Association (NGEA)-ko Shira didiataha.
