Williamnagar, Sept 4, 2024:A·chik Organisation for Social Welfare [AOSW] HQ, Simsanggre, Butbar salo Dobu PHC-ni ning·o donggipa Bolmoram Health & Wellness Centre (HWC) Sub Centre-o kam ka·gipa staff-rang dongjani gimin, East Garo Hills a·jani District Medical & Health Officer [DM&HO]-na lekka sedoataha.
Dobu PHC-ni ning·o donggipa Bolmoram Health & Wellness Centre-o kam ka·gipa staff-rang kamtangtangko ka·a tik ong·jani gimin, uamangni kosako ta·rake sandianiko dakenba raka ja·kurangko de·china AOSW dabiangaha.
AOSW-ni General Secretary Premier N.Sangma-ni parakatani gitade, Bolmoram Sub Centre, bang·a ning·tugipa songrangko cover ka·achim, uni gisepon badiaba songrangode, gari re·na man·gijagipa songni manderang bi·sangko, oko kegipa ma·giparangko aro bilsi brigipa manderangko sanna bananiko ra·na gita re·batokenga. Indiba sagipa manderangko sanna gita Bolmoram Health & Wellness Centre-o kam ka·gipa staff-rang dongjani a·sel bang·a songni manderang neng·nikaniko man·enga.
Unbaksana, Bolmoram Health & Wellness Centre-o bilsisa kingking ANM aro Nurse-rangba dongja. Je songni manderangan Bolmoram Health & Wellness Centre-o check up ka·na aro sagiparangko sanna gita ra·baengachim, darangba sangiparang dongjani gimin noktangona ra·angpilna nanganichi, manderangni janggiko gimaataona sokenga. Songni manderang sabisiko ma·sigija saako namatna Bolmoram Health & Wellness Centre-o man·gipa samrangko ra·angtokani gimin namen jagokmanpilani ong·enga aro indake namjabatsranggipa obostarang ong·engani gimin an·seng naljokanina kam ka·giparang aro sanna bananirangko gisik nange sanna bananiko on·china AOSW didiataha.
Bang·bata songni manderangan pring attamna kam ka·e cha·giparang ong·ani gimin, sagiparangko Williamnagar aro PHC-o sanna banna gita re·angna chol ong·je, namen neng·nikani ong·enga, ineba AOSW-ni dilgipa janapataha.
Uni gimin, Bolmoram Health & Wellness Centre-ona ta·rake ANM ba kam ka·giparangko watatenba, manderangni neng·nikarangko namtchina AOSW, Medical Health Officer-ko didiataha.
