Konjoi, April 20,2025:All Khasi Hills A·chik Federation (AKHAF)-ni bilsio tom·bimonganiko re·anggipa April 16 tariko Konjoi, A·chik songo ong·atangaha..
Tom·bimonganio miksonganiara A·chik a·songni manderang baksa ku·monggrike apsan ja·ku ga·ani, songtangko chel·chakani. Tom·aniona mongsongipa sokgiparangara GSMC, AHAM, AYAF, GSU, ABAHAM, Headmen Associations aro bang·a dingtang dingtang dolni dilgiparang bak ra·angtokaha.
AKHAF-ni President Clivestar Ch. Marak tom·bagiparangna agan talatengon, “Da·alo tom·bimongani miksonganira, Khasi Hills-o songdongenggipa A·chikrangni neng·nikaniko man·engani gimin ong·a. Mongsongbate, District Selection Committee (DSC)-ko A·chikrangna on·china, Garo Medium Skulrango gipin jatrangko appoint ka·gija, A·chik skigipako appoint ka·china, A·chikrangna NOC on·jani gimin, A·chik songrangni Headman-rangko ra·galna jotton ka·engani gimin, chanchirimaniko dakenga” ine AKHAF-ni President talatangaha.
Tom·anio GSU Khasi Hills Zone-ni President indake aganaha. ‘A·chikrangko KHADC-o bak man·atpana nangnikjaode, Sub Council-ko on·china dabigen, dabianirangko knachakjaode ba A·chik songni Headman-ko ra·galgenchimode, Garo Hills-o chapatna ja·ku ga·anggen’ ine GSU Khasi Hills Zone-ni dilgipa aganangaha.
Ri-Bhoi a·jao A·chikrang neng·nikani gimin aganengon, Khasi-rang A·chikrangko onchepe ra·a, Headman-ni bilko ra·sekengaha, NOC-ko on·jaenga, A·king Gore-ko sekdraenga, unbaksana Ri-Bhoi a·jao donggipa LP Skulo Khasi skigiparangko seokate, Garo Medium LP Skulo skina Garo ku·sikko man·jani a·sel, A·chik bi·sarang namen neng·nikani ong·enga. Indaken, songni chatro chatrirang skie ra·anio neng·nikani ong·engaha’ ine songni Headman aganaha.
Khasi-rang A·chik song Konjoi-B-ko aro gipin A·chik songrangko kal·ake roode, dingtang Regional Council-ko dabianggen ba Garo Hills baksa chapataniko dakgen’ ine A·king Nokma aganaha.
“A·chikrang namen jelbra jelsugipa jat ong·a. A·chikrang Garo Hills-o mang mangsan songdong a·chaaia ong·ja, bang·a biaprangon jedake Assam, Tripura, Nagaland, West Bangal aro Bangladesh a·dok aro a·songrangoba A·chikrangni songrang donga. Uni gimin A·chikrang chongipa jat ong·ja. A·chikrang namen dal·gipa jat ong·a. A·chikrang ku·agananio daka rikanio namen man·e cha·gipa jat ong·a. Uni gimin mikkangchi jattangni ku·bidikko dal·e ra·na nanga, unikoa daka-rikanirangko ripingna gisik nanggiparang ong·na nanga” ine GSMC HQ, Tura -ni Co-Chairman Jakrak A. Sangma, agannaha.
Tom·anio mongsongipa sokgipa GSMC HQ-ni Acting Chairman Balkarin Ch. Marak, indake aganaha “Garo-rangba World Indigenous Forum-ni dolsa, Nokgipa Isol-ni ong·atgimin jat ong·a. Indiba, A·chikrang an·tangtangni dakbewal rikbewalrangko name ripingjaode, changsao gimagen. Afghan jatrang gimikan an·tangtangon pangchakgipa ong·achim, indiba simsakjani gimin gimaatna nangaha. Apsan daken an·chingba simsakjaode, changsao gimagen. Sonaram R. Sangma British chasongonin A·chikrangni gisepo skangipa Politician ong·chengaha, ua 1895 bilsionin Garoland-na dakgrikchengaha. Indiba sorkarini kosako dabiani gimin, uko ka·mikkenataha. Indiba, ua indake aganchakaha, “Angko gobo Manda Chibima-chi galatbo, jeona angni be·en balpakanga unona Garoland (A·chik A·dok) ine see on·china aganskaha.
Jensalo India 1947 bilsio Jakgitel ong·ahaon, bang·a A·chikrangni bilko ripingchina bil on·aha. Uni gimin ua bilo pangchake, India-o Indigenous Rights-ko ripingani cholrang bang·bea, jekai Sixth Scheduled, Article 14, Article 14 unbaksana Article 29-o pangchake nanganirangko India-ni dal·batgipa dilgiparangna aganna bil gnang. Ru·uta bilsirangna A·chikrang neng·nikani donggenchimoba, mikkangchi apsan ku·monge kam ka·anichi jakgitelgipa A·chik a·song ong·atna jak on·pachina. Ia dal·begipa tim·bimongaona, Khasi Hills a·jani dingtang dingtang dolrang re·bae, bak ra·anina mittelpilskaani kattarangko AKHAF General Secretary Manuel Ch. Marak aganangaha.
