Williamnagar, April 8, 2925: Garo Hills aro Assam a·dokni sima ari jolrango skatang niam gri Rong·te bikote chiring chibisikrangko nosto ka·engani gimin Niksamso Garo Community Organisation (NGCO) HQ Simsanggre mikkrakataniko on·ataha.
Indake, niamgri rong·te bikotani a·sel, namgipa Tourist Spot ba biaprangko nosto ka·enga. Garo Hills-ni ong·telaigipa (nature) biaprang aro nitogipa rong·kolrang aro a·bri buringrangko nosto ka·e gimaataniko NGCO HQ-ni President Tengrak Marak raken jegalataha.
Garo Hills-ni je biaprangon tangkamgipa chiring chibisikrang dongachim, uarangoniko niamgri rong·te bikote, Assam aro Bangladesh a·songona badingsrukatengani gimin, A·kawe jolo donggipa A·chik songni nitogipa a·brirang aro bol wa·arang nosto ong·engaha.
South West Garo Hills a·jani Garobadha sepangjolo donggipa Tan Gaon, Chatibui songrango chiring chibisikrang nosto ong·aniko, “Chingni re·ange sandianiko dakanio jerangan rong·terangko bikotengachim, uamango maming licence ba permission dongja aro jerangan permission man·e rong·terangko bikotengachim uamangoba mining permission dongja. Indiba ua jolo jerangan rong·te Quarry-rangko chalaiengachim, uamang songni manderang ong·ja” ine Marak parakataha.
Indake ong·engon, State Forest Department sorkarini export ka·na ba rong·terangko bikote bading chiwalna challan on·anirangko nirok simsakgija aro niamgri rong·te quarry-rangko chalaigiparangara legal ma illegal, uarangko sandigija challan-rangko skatang on·enga ine NGCO matnangataha.
A·chik a·songni chiring chibisikrang aro buring bolgrimrangko niamgri nosto ka·aniko, “Chinga nie dongjawa aro tangkamgipa chiring chibisikrang, a·brirango blasting ba dynamite gale nosto ong·anganiko dintongchina,” NGCO mikkrakataniko on·ataha.
Je songrangan Nokma A·kingo ga·akachim,
Nokma Sordar-rang an·tangtangni a·dok chigako nosto ka·na on·jachina gitaba NGCO mikkrakataniko on·ataha.
Assam-ni rorirang skatang napdrae kam ka·e, songdong a·chaengachim, niamgri rong·te bikotanirangko NGCO raken champengataha. Unbaksana GHADC-ni gitaba nirok simsakaniko dakchina didiataha.
