Tura, Aug 19,2024: West Garo Hills a·jani a·kawe jolrango niam gri bol ratani karkana ba saw mill-rangko chalaiengani gimin dingtang dingtang NGO-rangni badi ka·ani ja·man, re·anggipa August 16 tarik Sukrobar salo, Garo Hills Autonomous District Council (GHADC)-ni Forest official-rang, Masangpani aro Nimaikata songrango niam gri chalaienggipa saw mill-rangko chipattokaha.

Niam gri chalaienggipa saw mill-rangko chadrapanio Forest Official-rang, saw mill-o jakkalenggipa dingtang dingtang bosturang ba ostrorangkoba ra·seke ra·baha.

“Ia jolrango niam gri saw mill-rangko chalaienga ine badi ka·anirangko man·soani ja·man chinga ia songrangona re·ange nion, ia saw mill-rango maming lekka aro licence gri chalaienga ine nikna man·aha. Chinga buring bolgrimrangko ripingna kamrangko ka·enga aro indake buring bolgrimrango donggipa bol wa·arangko rusie galaniko nie dongjawa” ine GHADC-ni Range Forest Officer parakataha.

Garo Hills-ni ning·tugipa songo nokrango iandake niam gri sawmill chalaianiko aro niam gri bol badingsrukanirangko nikgenchimode, ta·raken kobor on·china Forest Official-rang, songni nokni manderangko didiataha.
Uandake ia sawmill-rangko chalaienggipa manderangni kosako rakgipa ja·kurangko de·anggen ineba Range Forest Officer parakataha.

Mongsongbate, West Garo Hills a·jani a·kawe jolrango donggipa Phulbari, Masangpani, Nimaikata, Belbari aro New Bhaitbari songrango niam gri sawmill-rangko chalaiengani a·sel Garo Hills-ni bolrangko niam gri cha·ue sawmill-rangona ra·baenga ine adita salrangna skang, A·chik Progressive Approach (APA) Phulbari Western Zonal parakatenba, ia sawmill-rangko ta·raken chipatchina Holaidonga-ni Assistant Conservator of Forest (ACF)-ni in-charge-na sedoataha.

Ia sawmill-rangko ta·raken chipatchina Forest Official-ko didiatenba, ia jolrango niam gri sawmill-rangko chalaiengani a·sel samtangtango ong·telaigipa bakrangna nangchakeaniko ra·baenga aro buring bolgrimrangna dongimin niamrangko pe·ani ong·a ine APA Phulbari Western Zonal-ni General Secretary Pretington Marak parakataha.