Shillong, June 8,2025: Meghalaya a·doko niamgri koelarangko sriksrik cha·ue bikotenba gipin a·dokrangona watataniko Central Agency-chi namedake sandianirangko dakchina a·dokni gitcham Skotong Minister aro warachakenggipa dolni dilgipa Dr. Mukul M. Sangma changsatai gisik ra·atpilaniko dake didianiko on·ataha.

A·doko niamgri koelarangko bikote palsrukatgiparangni kosako, bang·a dingtang dingtang manderang badi ka·ahaoba, sakkirangko namedake sandijani a·sel pulisrangni kosakoba Dr. Sangma matnange aganaha.

A·dokni dingtang dingtang a·jarango bikotgimin koelarang badita dongkuengachim, uarangni hisapko skang 2018-2019 bilsirangon parakatmanaha, indide bikotgimin koelarang maikai lak 2-3 MT-oni lak 32 MT dongkuna nanga, ine Dr. Sangma sing·doataha.

A·doko niamgri koelarangko bikote palatengani gimin bang·a songdonggipa manderang badi ka·ahaoba, pulisrang uarangko maming saloba segatjaha aro batesa a·doko niamgri koela bikotanirang dongja ine a·kangskaenga ine warachakgipa dolni dilgipa aganaha.

“Niamgri sriksrik koelarangko bikote palatengon, pulisrang maidakesa, a·doko niamgri koela bikotani sakkirangko man·skaja” ineba Dr. Sangma sing·doangaha.