Shillong, Dec 11,2024: Meghalaya a·doko JJM-ni kamrangko matchotatna gita a·dok sorkari 2025 bilsini March jako donengon, da·o dipet 81.39 percent-mang matchotaha, ine PHE Minister parakataha.
“Chinga 81.39 percent kamrang matchotaha. Kam ka·ani somoiko on·taiengahani gimin contractor-rang uamangni kamrangko a·bachengattaiengaha” ine PHE Minister, Marcuise N Marak aganaha.
“JJM-ko dongimin somoi gita matchotatna man·jani a·sel somoiko dontaienga aro dongimin somoirangko bang·a changrangna donataiaha. A·a nangan baksa, buring bolgrimrangko o·na nanganichi somoirangko ru·ute nangenga. Buringrangko o·na nangani gimin adita project-rangna neng·nikanirangko man·enga. Mitam project-rang chi man·gipa biapo ba ja·pango a·a ran·enga. Anga ua neng·nikanirangko Skotong Minister-na aganaha aro chiko man·kamna gita chi man·ani ja·pangko dingtangatna nanganio tangka paisarangko am·dapna nangaha” ine Marak aganaha.
Bang·bata a·arangon neng·nikanirang donga baksa buring o·na somoiko nangahani gimin department kamrangko ka·na gita man·ningjaha, ineba ua aganaha.
JJM-ni biapo bolrangko den·ani gimin sing·on, bolrangko den·na nangja, ine aganaha. JJM-ko kam ka·anirang tik ong·ja ine badiaba political dolrang aro songni manderangchi matnanganiko man·ani gimin sing·on, “JJM-na forest department-ni NOC-ko nangani a·sel ru·uate mitam kamrangko matchotatna man·kujaenga” ine PHE Minister parakataha.
“Indiba mikkang bilsini March jao JJM-ko matchotatna ka·dongenga” ine Marak agandapataha.
Garo Hills-o JJM-ni kamrang namen ka·sinenga aro mitamrangko galchipenga, mitamrango contractor-rang kam ka·gija dongenga. Badiaba project-ko galaha aro uko gipin contractor-rangna pakwatataha, ineba ua aganaha.
