Shillong, May 7, 2025:Re·anggipa April 22 tariko Pakistan a·songni bobil dolrang, Jammu aro Kashmir a·dokni Pahalgam tourist biapo dos gri manderangko chadrape so·otani bidingo India a·song gimikon dakgrikanio an·tangna chel·chakaniko skie ra·china Mock War Drill-ko ong·atchina ma·mong sorkari ge·etaniko on·ataha. Indiani pilak a·dokrangon Mock drill exercise-ko May 7 tarik Butbar salo ong·atna nanggen ine ma·mong sorkari u·iataha.
Indake, Meghalaya a·dokni Shillong, Tura aro Jowai songjinmarango, Butbar attamni 4 bajio Mock War Drill-ko ong·atchina, Meghalaya a·dokni Directorate of Civil Defence & Home Guards-ni PRO, PH Shylla u·iataha.
Ministry of Home Affairs (MHA)-oni u·iataniko man·soe Meghalaya a·dokni Shillong, Tura aro Jowai songjinmarango mock war drill-rangko ong·atanggen.
Ia mock war drill-ko ong·atanio, kobor ra·grikani Control Room-rango maikai kam ka·na nanggen, maikai kenani somairango manderangna mikrakkatani chinko gam·atgipa ba Siren-rangko gam·ate manderangna u·iataniko aro mikrakkataniko on·gen, uandakgiparangko man·gopgen. Ia drill-ko skul bi·sarangnaba maikai an·tangtangko bobilrangoni naljoke rakkigen, uandakgiparangni bidingo skie on·angjolgen, ineba u·iataha.
Pakistan a·songoni bobil dolrang re·anggpa April 22 tariko Pahalgam-o sak 26 dos gri manderangko so·ote galani ja·man, uarangni bidingo songdongenggipa manderang simsakna nangengaha ine ma·mong sorkari, ia mock war drill-rangko Indiani pilak a·dokrangon dakna nanga ine ge·etaniko on·ataha.
