Tura, Oct 22, 2024: Meghalaya a·dokni chatro chatrirang Scholarship-na dorgastorangko galenggipa bang·a chatro chatrirangan, Income Certificate-ko tarina nangengani a·sel neng·nikanirangko man·tokenga ine Federation of Khasi Jaintia & Garo People (FKJGP) Garo Hills Zone parakatenba, chatro chatrirangni namgnina ia neng·nikanirangko ta·rake nirokatchina a·dokni Education Minister Rakkam A Sangma-na West Garo Hills a·jani DC Jagdish Chelani-ni jak gita chitti sedoataha.

FKJGP-GHZ iani bidingo a·dokni Education Minister-na sedoatenba, Garo Hills-o Scholarship-na dorgasto galenggipa bang·a chatro chatrirang neng·nikanirangko man·tokengani gimin, Income Certificate-ko tarianio niam gita ong·jaenga ine parakataha.

FKJGP GHZ-ni parakatani gitade, bang·a chatro chatrirang Income Certificate-ko tarianio neng·nikenggipa mingsara Garo Hills-ni dingtang dingtang biaprango Income Certificate-ko tarina dingtang dingtang lekkarangko nangengani a·sel ong·enga.

Uandake, West Garo Hills a·jao Income Certificate-ko tarina adita lekkarangko nangengon, South West Garo Hills a·jaode, Income Certificate-na gipin dingtang lekkarangkosa nangskaengani gimin chatro chatrirang neng·nikaniko man·tokenga ineba FKJGP-GHZ parakataha.

Uni gimin, dingtang dingtang Civil Sub Division-rango Income Certificate-rangko on·giparang dongjani a·sel, BDO-rang Certificate-ko on·na jechakengani gimin, online aro offline gita dorgastorangko galanio nangenggipa lekkarang dingtanggrikenba, Office-o kam ka·giparangna dakchakaniko on·jaenga, online gita dorgastorangko galanio niamrang bang·ani gimin, uandakgipa a·selrangchi chatro chatrirang, scholarship-na dorgastoko galanio neng·nikanirangko man·enga ine FKJGP-GHZ parakataha.

A·dokni chatro chatrirang Scholarship-ko man·na gita Income Certificate-ko nangengani gimin, bang·a chatro chatrirang neng·nikaniko man·enga. Uni a·sel bang·a chatro chatrirangan, Scholarship-na dorgastorangko galna namniktokjaenga. A·dokni Chatro chatrirang, Scholarship-na altubate dorgastorangko galna man·na gita a·dokni a·ja ge·antion, Offline Single Window System-ko ra·gatskachina FKJGP GHZ, a·dokni Education Minister-ko didiataha.