Shillong, Jan 11, 2025: Meghalaya a·dokni dingtang dingtang sorkari department-rango Muster Roll ka·gipa ba hajira kam ka·e cha·enggipa sak 85,000 mangni namgnina a·dok Cabinet, Minimum Wage ba onbatgipa hajirarangko bariatna ra·chakaha.

Labour kam ka·giparangni hajirako bariatna tik ka·anio, Unskilled labour-na salprako gong 419-oniko gong 525-ona (gong-106), Semi-Skilled labour-rangna gong 474-oniko gong 565-ona (gong-91), Skilled labour-rangna salo gong 530-oniko gong 605-ona (gong-75) aro Highly Skilled labour-rangna salo gong 586-oniko gong 654-ona (gong-68) ka·e hajirarangko bariatna tik ka·aha ine a·dokni Skotong Minister Conrad K Sangma parakataha.

A·dok Cabinet-ni ra·chakgimin gital hajirako pilak department-rang aro dolrangan ja·rikna nanggen ine talatenba, ia niamko ja·rikjagenchimode, Labour Department-na badi ka·na gita man·gen ine Skotong Minister parakataha.

Indake, Meghalaya Buildings and Other Construction Workers Regulation and Employment Condition Rules, 2008 Amendment-koba Cabinet ra·chakaha ine Sangma parakataha.

“Chinga je kajinarangko ra·enga, ia kajinarangko biming segatgimin sak hajal 80,000 ba 85,000 labour-rangni namgnina jakkalenga. Ia namgnirangara, sanna banani grorangko chotani, be·enni gita cholgri ong·giparangna dakchakani, skul aro
college-rango poraienggipa chatro chatrirangna dakchake on·skaenga. Ia niamko taridapanichi biming segatgimin labour aro uamangni nokdangrangna on·enggipa namgnirangko bariataha” ine Skotong Minister kobor ra·timgipangna aganaha.